3 അലോട്ട്‌മെന്റുകൾ പൂർത്തിയായിട്ടും മലപ്പുറം ഉൾപ്പെടെ മലബാറിൽ സീറ്റ് ക്ഷാമം രൂക്ഷമാണ്.
തിരുവനന്തപുരം: പ്ലസ് വൺ സപ്ലിമെന്ററി അലോട്ട്‌മെന്റിന് അപേക്ഷിക്കാനുള്ള സമയപരിധി ഇന്ന് അവസാനിക്കും. അപേക്ഷകൾ പരിഗണിച്ച് സപ്ലിമെന്ററി അലോട്ട്‌മെന്റ് ലിസ്റ്റ് അടുത്ത ദിവസം പ്രസിദ്ധീകരിക്കും. അതിനുശേഷം താലൂക്ക്തല പരീക്ഷ നടത്തി കൂടുതൽ സീറ്റുകൾ അനുവദിക്കുമെന്ന് സർക്കാർ ഉറപ്പുനൽകി. 3 അലോട്ട്‌മെന്റുകൾ പൂർത്തിയായിട്ടും മലപ്പുറം ഉൾപ്പെടെ മലബാറിൽ സീറ്റ് ക്ഷാമം രൂക്ഷമാണ്.
പ്ലസ് വൺ പ്രവേശനവുമായി ബന്ധപ്പെട്ട് വ്യാജ ആരോപണങ്ങൾ പ്രചരിപ്പിക്കുന്നത് നിക്ഷിപ്ത താൽപര്യക്കാരുടെ ചെറുസംഘമാണെന്ന് വിദ്യാഭ്യാസ മന്ത്രി വി ശിവൻകുട്ടി ആരോപിച്ചു. കഴിഞ്ഞ തവണ പ്ലസ് വൺ പ്രവേശന സമയത്തും ഇവർ ഈ ആരോപണങ്ങൾ ഉന്നയിച്ചിരുന്നു. എന്നാൽ ഒരു തടസ്സവുമില്ലാതെ പ്രവേശന നടപടികൾ പൂർത്തിയാക്കി. പ്രവേശനത്തിനുള്ള പ്രോസ്‌പെക്ടസ് തയ്യാറാക്കുന്നതിന് മുമ്പ് തന്നെ ഇത്തരം ആരോപണങ്ങളുമായി വരുന്നവർക്ക് നല്ല ഉദ്ദേശമില്ലെന്നും മന്ത്രി പറഞ്ഞു.
കേരളത്തെ തെക്കും വടക്കും എന്ന് വിലയിരുത്തുന്നത് തികച്ചും അനാരോഗ്യകരമായ പ്രവണതയാണ്. കേരള സംസ്ഥാന രൂപീകരണത്തിന് ശേഷം അധികാരത്തിൽ വന്ന ഒരു സർക്കാരും ഇത്തരമൊരു നിലപാട് സ്വീകരിച്ചിട്ടില്ല. അതുകൊണ്ട് ഇത്തരം കുപ്രചരണങ്ങൾ നടത്തുന്നവരെ ഒറ്റപ്പെടുത്തണം.
പ്ലസ് വൺ പ്രവേശനത്തിൽ വിദ്യാർഥികളും രക്ഷിതാക്കളും ആശങ്കപ്പെടേണ്ടതില്ല. പ്രവേശന നടപടികൾ പൂർത്തിയാകുമ്പോൾ, മുൻവർഷത്തെപ്പോലെ ആശങ്കയ്ക്ക് അടിസ്ഥാനമില്ലെന്ന് വ്യക്തമാകും. ഉപരിപഠനത്തിന് അർഹതയുള്ള എല്ലാ വിദ്യാർത്ഥികൾക്കും കേരളത്തിൽ പഠിക്കാൻ അവസരം ലഭിക്കുമെന്നും മന്ത്രി ഫേസ്ബുക്കിൽ കുറിച്ചു.
